რატომ არის ქართული სუფრა მსოფლიოში გამორჩეული?

2020-01-28
ალბათ გსმენიათ ქართულ მასპინძლობაზე, სამზარეულოსა და მის გამორჩეულ კერძებზე. და, თუ არა, მაშინ ჩვენი ბლოგი დაგეხმარებათ გაიგოთ რა ხდის ქართულ სუფრას გამორჩეულს. ქართულ კულტურაში კულინარიას და სტუმარს მნიშვნელოვანი ადგილი უჭირავს. სტუმრის მოსვლა და დღესასწაულები ყოველთვის სუფრით აღინიშნება. ქართული სუფრა თავისი წესებით წარმოადგენს სოციალურ აქტივობას და სტუმრისადმი პატივისცემის გამოხატვის გზას.  რა ხდის ქართულ სუფრას გამორჩეულს? თამადა, განსხვავებული კერძები და სასმელი, სუფრის წევრი ქართველები თუ ქართული ცეკვა და სიმღერა? - ვფიქრობთ, ყველაფერი ერთად. 1. თამადა - ლიდერი სუფრაზე ქართული სუფრა წარმოუდგენელია თამადის გარეშე. თამადა არის სუფრის ლიდერი, რომელიც მართავს მას, წარმოთქვამს სადღეგრძელოებს და პასუხისმგებელია სტუმრების გართობაზე. სადღეგრძელოებს სიმბოლური დატვირთვა აქვთ და თამადის შემდეგ სუფრის სხვა წევრები სადღეგრძელოს თავიანთ ვერსიას წარმოთქვამენ. თამადობა მარტივი არ გეგონოთ, ამასაც ნიჭი უნდა :). 2. ქართული კერძების მრავალფეროვნება ქართული კულინარია განიცდის როგორც დასავლეთის, ისე აღმოსავლეთის გავლენას, რაც სხვადასხვა კერძებზე აისახა. ყველაზე ცნობილი ქართული კერძებია: ხაჭაპური, ხინკალი, მწვადი, საცივი, ჩაქაფული, ხარჩო და ჩურჩხელა, რომელიც კლასიკურ დესერტს წარმოადგენს. კერძების მომზადების მეთოდი საქართველოს რეგიონების მიხედვით განსხვავებულია. მაგალითად, ერთ-ერთი ყველაზე პოპულარული ქართული კერძი - ხაჭაპური - 6 ვერსიით არის წარმოდგენილი - იმერული ხაჭაპური, მეგრული ხაჭაპური, აჭარული ხაჭაპური, ლაზური ხაჭაპური, მესხური ხაჭაპური და ოსური ხაჭაპური. მათგან საუკეთესო თავად უნდა აარჩიოთ. ქართულ სამზარეულოში წარმოდგენილია ხორცის და თევზის, ვეგეტარიანული და წვნიანი კერძები, ცომის ნაწარმი და ყველი, სალათები და დესერტი. ამიტომ, თუ შემთხვევით ქართულ ტრადიციულ სუფრაზე მოხვდებით, თქვენთვის სასურველ კერძს აუცილებლად იპოვნით. ჰო და ქართული ღვინო არ დაგავიწყდეთ.   3. ქართული ღვინო (ღვინის სამშობლო, 8000 წლიანი გამოცდილებით) ვინმეს დაუთვლია რამდენი სახეობის ღვინოა მსოფლიოში? ჩვენ ნამდვილად არა. თუმცა ქართული ღვინო რომ განსაკუთრებულია, ამაზე არც კი შევედავებით ვინმეს.  ერთია ის, რომ ადგილობრივი ვაზის ჯიშები სხვაგან თითქმის არ მოიპოვება და მეორე, ღვინის მომზადების ტრადიციული მეთოდი, რაც გულისხმობს ღვინის ქვევრში (თიხის ჭურჭელში) დაყენებას. ქართულ ტრადიციულ მეთოდს იუნესკოს არამატერიალური კულტურული მემკვიდრეობის ძეგლის სტატუსი სწორედ უნიკალურობის გამო მიენიჭა.  ქართული ღვინის დაყენების ტექნოლოგია საქართველოს კუთხეების მიხედვით განსხვავდება. კახეთში ჭაჭის მთლიან რაოდენობასთან ერთად დადუღდება, იმერეთში კი საწნახელში დაწურვის შემდეგ ქვევრებში ჩასხმულ ყურძნის წვენს ჭაჭის მაქსიმუმ მესამედ ნაწილს უმატებენ. ამ ყველაფერზე საუბარი ღვინის თანხლებით სჯობს, ამიტომ მოგვიანებით გავაგრძელოთ. 4. სტუმართმოყვარე ქართველები (ტრადიციის ნაწილი) საქართველოში სტუმრის მიმართ დამოკიდებულება საუკუნეების წინ ჩამოყალიბდა, ბევრად უფრო ადრე, ვიდრე ტურიზმი ქვეყნის ერთ-ერთი წამყვანი სფერო გახდებოდა. ჩვენ გვიყვარს სტუმრები და მათ ღვთის საჩუქრად მივიჩნევთ. ბევრი ძველი ქართული გამონათქვამი გამოხატავს ქართველთა დამოკიდებულებას და სტუმრების მიმართ პატივისცემას, თუმცა ყველაზე ცხადად ეს ქართულ სუფრაზე იგრძნობა. ყველა ტურისტი საქართველოს სტუმარია და ჩვენი სურვილია არა მხოლოდ ქვეყნის, არამედ ჩვენი სახლების კარიც ღია იყოს მათთვის. საქართველოში ჩამოსულ მოგზაურებს ხშირად არ ეძლევათ საშუალება ქართულ ოჯახებში მოხვდნენ, ახლოს გაიცნონ და გამოსცადონ ქართული სტუმარ-მასპინძლობის ტრადიცია. GuestMe-ის შექმნის მიზანი სწორედ ის არის, რომ საქართველოში ჩამოსულ ყველა სტუმარს მივცეთ ასეთი გამოცდილების მიღების საშუალება.  ჩვენი მისიაა შევქმნათ ქართული სუფრისა და სტუმართმოყვარეობის დასამახსოვრებელი გამოცდილება საქართველოში მყოფი ყოველი მოგზაურისთვის. თქვენ უკვე თავად შეგიძლიათ აირჩიოთ დაუვიწყარი სადილი ქალაქის ცენტრში, ძველ ქალაქში განთავსებულ პატარა ბინაში, ან თუნდაც წყნარ სოფელში მდებარე ტრადიციულ სახლში, თქვენ მიერვე შერჩეული ქართული კერძებით.
იხილეთ მეტი